Albûma yekem a Hêja bi navê "Stranên Neşuştî" derket

Yekem albûma lîstikvana sînema û şanoyê Hêja, bi navê "Stranên Neşuştî" derket û albûm, ji sê stranên bi kurdî pêk tê.

Yekem albûma hunermend û stranbêja kurd Hêja, bi navê "Stranên Neşuştî" hemû platformên dîjîtal û marketên muzîkan derket û li pêşberî guhdarvanên muzîkê ye. Di albûma "Stranên Neşuştî" de,  sê stranên femînîst û bi devê jinan nivîsandine, cih digirin. Cureya albûmê, di navbera Folk Pop û Folk Rockê de ye û ji vokalên grotesk û eksperîmental pêk were.

Di albûma nû ya Hunermenda kurd Hêja de, 3 stranên bi navê "NeNe", "Derî Lêket", "Belkî" cih digirin. Gotin û muzîka strana "NeNe" Hêja bixwe çêkiriye û qala jiyana rojane ya jinekê dike û li ser keda hundura malê ya jinan disekine. Gotin û muzîka strana bi navê "Derî Lêket" jî Hêja bi xwe bestekiriye û di stranê de jineke henekê xwe bi tenêtiya xwe dike. Strana "Belkî" ji helbesta bi navê "17" yê helbestvanê kurd Roşeng Rojbîr, hatiye bestekirin û qala tenêtiya dîrokî ya gelê Kurd dike.

Di albûma "Stranên Neşuştî" de Cansun Kuçukturk dîrektorê muzîkê ye, stranên albûmê amade û arenje kiriye û bi bas gîtar, elektro gîtar û klavyeya xwe ve cih girtiye û hi heman demê de Mix û Masteringa stranên albumê ji aliyê Kucukturk re hatine çêkirin. Her sê stranan li girtîgehê hatine bestekirin.

Di" Stranên Neşuştî" de muzikvanên wekî Bulent Altınbaş (Klarnet), Yaşar Akpençe (perkusyon), Gurkan Çakmak (Zirne) û (Dûdûkê), Omer Avci (Dahol) cih digirin.

Nûçe: Rûmet Med

Hêja kî ye?

Hêja li Qesra Qenco ya Mêrdîn jidayik bûye. Dema li Zaningeha Bogaziçiyê Edebiyata Îngilîzî dixwend, li Kluba Folklorê bi awayekî profesyonel ket nav muzîkê. Li vir bo sê salan, dersên stranbêjî û muzîkê girt, li ser muzîka gelerî ya Kurdan û dengbêjiyê lêkolîn kirin û ket nav karên berhevkirina stran, klam û çîrokên kurdî.

Ji Cavid Murtezaoglu dersa stranbêjiyê wergirtiye. Vedat Yildirim û Feryal Oney dersên şêwe û teknîkên strandinê dan wê. Di heman demê de li ser Edebiyata Kurdî hûr bû û li Kluba Edebiyatê ya Bogaziçiyê karê kovargeriya Kurdî kir. Dûre nasnameyên xwe wek wêjekar û muzîkjen anîn gel hev û bi awayekî edebî nêzîkî muzîkê bû.

Herî dawî strana Michal Jackson ya bi navê “They Don’t Care About Us” ji bo Bajar wergerand Kurdî û vê xebatê gelekî deng ligel xwe anî.

Piştî ku ji zaningeha Columbiayê bo Masterê hat qebûlkirin, dema xwe amade dikir biçe Amerîkayê ji ber sedemên siyasî hat girtin. Li girtîgehê xwe fêrî lêxistina gîtarê kir û dest bi çêkirina besteyan kir. Ev gelek sal in karê dublajê dike û herwiha di film û şanoyên cûda de karê lîstikvaniyê kiriye. (Rudaw)