Nûçe: Rûmet Med
7 kurteçîrokên nû yên wêjekarê navdar ê Arjantînî Julio Cortázarî piştî bi dehan salan hatin dîtin. 7 kurteçîrok berî avêtina çopê hatine dîtin û piştî salekê fam dikin ku berhemên Cortázarî ne.
Nivîskarê hoste Julio Cortazar, bi roman û çîrokên xwe ve tê naskirin û yek ji nûnerên herî girîng ê wêjeya Amerîkaya Başûr e ku di sala 1984ê jiyana xwe ji dest dabû. Di destpêka meha Cotmehê de hate eşkerekirin ku 7 kurteçîrokên nû yên Cortázarî hatine dîtin, nivîskarê van çîrokên xwe berî weşandina “Historias de cronopios y d famas”ê nivîsandine.
Julio Cortazar berî ku biçe li Parîsê, sê berhemên wî li Buenos Airesê hatibûn çap kirin. Di sala 1951ê de ji ber sedemên sîyasî ji Arjantînê diçe li Frensayê, heman salê pirtûka wî ya bi navê “Bestiario” tê weşandin. Piştî deh salan, berhema wî ya “Rayuela” derdikeve li pêşberî xwîneran û di heman salan de karakterên pevxistî yên bi navê ‘Cronopios’ê diafirîne ku ji namea nivîskarê pêk tê û li ser teorîya wêjeyê hatîye nivîsandin. Di sala 1962yê de berhema “Historias de cronopios y d famas” hatiye weşandin. Lê belê piştî gelek salan, 7 kurteçîrokên wî yên nû jî hatin dîtin.
Kurê berhevokvanekî Uruguayî, di sala 2019ê de piştî mirina bavê xwe, guhertoyeke pirtûkê ya bi daktîloyê hatiye nivîsandin peyde kiriye. Berhema ku pê daktîloyê hatiye nivîsandin ji 46 kurteçîrokên Julio Cortázarî ku ji hevalê xwe re şandine pêk tê. 35 çîrokên vê pirtûkê di çapa 1962yê ya “Historias de cronopios y d famas”ê de cî digirin û 4 çîrokên pirtûkê jî di kovarên wê demê de hatibûn weşandin. Malbata berhevokvanê, pirtûkê berî avêtina çopê dibînin û dixwazin bizanin ka berhema Cortázarî ye yan na. Ji ber vê, bi akademîsyen û berhevokvanê pirtûkên antîkayê Lucio Aqulianti re dikevin têkilîyê. Piştî lêkolînê, dibînin ku berhema wêjeyî pê daktîloya “Olivetti Letera 32″yê ya hevsara Cortázarî, Aurora Bernandezê hatiye temam kirin. Nivîskar, daktîloya “Olivetti Letera 32″yê heta sala 1966ê jî bikar anîye.
Di heman demê de, berhemên din ên Julio Cortázarî yên li Pirtûkxaneya Neteweyî ya Arjantînê vedikolin û dibînin ku kurteçîrokên nivîskarê ne. Lucio Aqulianti di derbarê encama lêkolînê de axaftineke kiribû û gotibû: “Ez teqez dikarim bipejirînim ku ev berhemeke resen a nivîskarê ye ku pê daktîloyê hatiye nivîsandin û xwedî girîngîyeke mezin e.” Lê belê kurteçîrokên nivîskarê çawa ketine destê berhevokvanê hêj ne hatîye çareser kirin. Kurteçîrokên Julio Cortázarî yên neweşandî, dê bi mezatê bi vekirina 12 milyon dolarî bêne firotin (Mala Mezadê ya Zorilloyê).
Bi tenê sernavên 7 kurteçîrokên Cortázarî hatin eşkerekirin; “Inventario”, “Carta de un fama a otro fama”, “Mariposas automáticas”, “Los viajes y los sueños”, “Diminuto unicornio”, “Rabia del espejo” û “Rey del mar.” Xwedîya/ê berhemê yê/a niha, nasnameya xwe vedişêre û hatibû eşkerekirin 7 kurteçîrokên Julio Cortázarî di 12ê Cotmehê de ji aliyê Malên Mezadê yên Zorrilla û Hilario (Montevideo û Buenos Aires) ve bi mezatê dê bêne firotin.
Çîrok û romanên wêjekarê hoste Julio Cortázarî heta niha bi dehan zimanan hatine wergerandin. Cortázarî, gelek berhemên nivîskarê mezin Edgar Allan Poeyî wergerandine bo zimanê îspanî û senaryoyên gelek fîlmên sînemayê nivîsandine.*
Çavkanî: El Pais, Independent Türkçe
Sînemaya Serbixwe – www.sinemayaserbixwe.com
Hiç yorum yok: